ភ្នំពេញ : អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី២៥ ខែសីហា ឆ្នាំ២០២១ បានចេញប្រកាសមានកម្រិតហានិភ័យចំពោះទីតាំងចំនួន៥រួមមាន៖

១, ធនាគារភ្នំពេញពាណិជ្ជ PPC Bank ដែលមានទីតាំងស្ថិតនៅអគារលេខ ២១៧ ផ្លូវព្រះនរោត្ដម សង្កាត់ទន្លេបាសាក់ ខណ្ឌចំការមន រាជធានីភ្នំពេញ នៅថ្ងៃទី២៣ ខែសីហា ឆ្នាំ២០២១ បុគ្គលិកចំនួន ០៣នាក់ រកឃើញវិជ្ជមានកូវីដ-១៩។

២, នៅគ្រឹះស្ថានមីក្រូហិរញ្ញវត្ថុ អាក់ទីវភីភល ភីអិលស៊ី (សាខាជ្រោយចង្វារ) ACTIVE PEOPLE’S Microfinance institution plc. ដែលមានទីតាំងស្ថិតនៅ ផ្ទះលេខ១០B ផ្លូវលេខ៦ ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ បុគ្គលិកចំនួន ០២នាក់ត្រូវបានរកឃើញវិជ្ជមានកូវីដ-១៩។

៣, អ្នកជំងឺកូវីដ-១៩ បំប្លែងថ្មី Delta បានទៅផ្សារចាស់ ប៉ះពាល់ផ្នែកខាងលិចផ្សារ និងបានទៅពិសារនំបញ្ចុកស្រុះនៅថ្ងៃទី១៤ សីហា ឆ្នាំ២០២១ វេលាម៉ោង១៤:០០។ ថ្ងៃនេះក្រុមគ្រូបានចុះទៅយកសំណាក អាជីវករចំនួន ២៤នាក់ លទ្ធផលអវិជ្ជមាន។

៤, នៅការដ្ឋានសាងសង់រោងកុនផ្សារទំនើបជីបម៉ុងសែនសុខ ដែលមានទីតាំងស្ថិតនៅ ផ្លូវម៉ុងរិទ្ធី សង្កាត់ភ្នំពេញថី្ម ខណ្ឌសែនសុខ រាជធានីភ្នំពេញនៅថ្ងៃទី២១ ខែសីហា ឆ្នាំ២០២១ កម្មករចំនួន ០៤នាក់ តេស្តរកឃើញវិជ្ជមានកូវីដ-១៩។

៥, ផ្សារបណ្តោះអាសន្នសិនជូរីផ្លាហ្សាដែលមានទីតាំងស្ថិតនៅ ភូមិតាងួន១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញនៅថ្ងៃទី២០ និង២១ ខែសីហា ឆ្នាំ២០២១ បានរកឃើញវិជ្ជមានកូវីដ-១៩ ចំនួន ១២នាក់ ក្នុងចំណោមអ្នកទៅធ្វើតេស្ត ២៤៩នាក់។

អនុគណៈកម្មការស្រាវជ្រាវ និងតាមដានបុគ្គលសង្ស័យនិងណែនាំឱ្សប្រជាពលរដ្ឋដែលធ្លាប់បានទៅទីតាំងខាងលើ ដាក់ខ្លួនដាច់ដោយឡែកនិងតាមដានសុខភាពរបស់ខ្លួនរយៈពេល ១៤ថ្ងៃ តាមវិធានសុខាភិបាលរាប់ចាប់ពីថ្ងៃដែលអ្នកបានទៅទីកន្លែងនោះ នៅថ្ងៃឬក្រោយថ្ងៃអ្នកជំងឺបានទៅ។

អនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ-១៩ បានអំពាវនាវដល់ប្រជាពលរដ្ឋធ្លាប់ទៅទីតាំងទាំង៥នេះ ប្រសិនបើមានអាការៈមិនស្រួលខ្លួន ឬលេចចេញរោគសញ្ញា គ្រុនក្តៅ ក្អក កណ្តាស់ ឈឺក ហៀរសំបោរ ហត់ ឬពិបាកដកដង្ហើមសូមមេត្តាប្រញាប់ទៅធ្វើតេស្តរកមេរោគកូវីដ-១៩។

ទីតាំងសម្រាប់ធ្វើតេស្ដមាននៅវិទ្យាល័យបាក់ទូក វិហារយេស៊ូ ច្រមុះជ្រូកស្ទឹងមានជ័យ (ខណ្ឌមានជ័យ) ផ្លូវទ្រុងមាន់ (ខណ្ឌសែនសុខ) ម៉ូឌែន៥ (ខណ្ឌឫស្សីកែវ) សួនការណាឌីយ៉ា (ខណ្ឌមានជ័យ) និងមន្ទីរពេទ្យបង្អែកនៅតាមបណ្តាខេត្តនានា៕